27 апрелга ўтар кечаси Ўзбекистон «Спутник V» вакцинасининг яна бир партиясини қабул қилиб олди. Бу ҳақда Соғлиқни сақлаш вазирлиги матбуот хизмати хабар бермоқда.

Шунингдек, яқин кунларда Ўзбекистонга ўзбек-хитой ZF-UZ-VAC2001 ва AstraZeneca вакциналарининг қўшимча дозалари етказиб берилиши кутилаётгани маълум қилинган.

Эслатиб ўтамиз, 23 апрелга ўтар кечаси Ўзбекистонга «Спутник V» вакцинасининг дастлабки партияси олиб келинганди. Ўзбекистонга аҳолини эмлаш учун олиб келинадиган «Спутник V» вакцинасининг ярмини тадбиркор Алишер Усмонов молиялаштирган. Олдинроқ ушбу вакцинадан жами 1 миллион доза сотиб олиниши режалаштирилган эди.

Россия элчихонаси маълумотига кўра, иккинчи партияда 50 минг доза вакцина етказиб берилган. 28 апрел кунидан республикада Россия вакцинасини қўллаш бошланади.

Бундан олдинроқ Ўзбекистонда сўнгги бир кунда яна 20 мингдан ортиқ киши вакцина қабул қилгани ва 1 апрелдан буён эмланганлар сони 570 мингга яқинни ташкил қилаётгани ҳақида хабар берилганди.