Сизнинг Республика ихтисослаштирилган Травматология ва ортопедия илмий-амалий тиббиёт марказида ташриф буюрувчилар ва беморлар сони кўплигига қарамасдан, бинодаги ҳожатхоналардан умумий тарзда фойдаланилаётганлиги юзасидан билдирган мурожаатингиз кўриб чиқилди.
Мурожаатда кўтарилган масала юзасидан қуйидагиларни маълум қиламиз.
Марказнинг  жами 5 та санитария-гигиена хонаси мавжуд бўлиб, уларнинг барчаси фойдаланиш мақсадига кўра белгиланган. Жумладан, 5 қаватли биносида 1-қаватда жойлашган 3 кабинали ҳожатхона аёллар учун, ертўла (0) қаватидаги 3 кабинали ҳожатхона эса эркаклар учун ажратилган. Шунингдек, мазкур қаватда мавжуд 2 та ҳожатхонада ҳам улардан аёллар ва эркаклар учун алоҳида фойдаланиш белгилари ўрнатилган.
Бундан ташқари, Марказнинг 7 қаватли биносида ҳам санитария хоналари мавжуд бўлиб, улар қаватлар кесимида ташкил этилган. Жумладан, 3-қаватда 2 та, 2-қаватда 2 та, 1-қаватда 2 та ҳамда алоҳида 1 кабинали ҳожатхоналар мавжуд.
Шу билан бирга, Марказда даволаниш ва тиббий хизматлардан фойдаланувчи беморлар ҳамда ташриф буюрувчилар сонининг ортиб бораётганлиги инобатга олинган ҳолда, жорий йил октябрь ойига режалаштирилган реконструкция ишлари доирасида янги кутиш зали барпо этилиши кўзда тутилган.
Тасдиқланган реконструкция лойиҳасига мувофиқ, мазкур кутиш залида ташриф буюрувчилар учун қўшимча санитария-гигиена хоналари ташкил этилади. Хусусан, аёллар учун 5 кабинали ва эркаклар учун 5 кабинали ҳожатхоналар барпо этилиши режалаштирилган.